15703636
MODRA PRIČA

Cilo naše malo misto je u žalosti - partija je Čovik. Neka mu je laka zemja i neka gori sviri u armuniku

Piše Jadran Šantić Šangarelo
Foto Ivo Ravlić/Ilustracija/Cropix
4. siječnja 2021. - 11:05

Štovani štioci, nisan van se odavna javi jerbo iman problema sa zdravjen i kad pišen, ovi jebeni Parkinsonizam mi trese ruke pa puno falijen slova. Naslov san napisa kratak jerbo bi bilo puno tega za stavit pa san se odlučija za ovako kratko, a kroz dajnji tekst ću van sve spjegat.

U naše malo misto živija je jedan jako osebujan čovik. Zva se Mate Peko, zvani Škaja joli Njoko. Bi je vrstan pivač i ribar kome je lignja bila krajica mora. Bija je jedno vrime i pulitičar, ma pošteni ljevičar koji je uvik za Prvi maja jema lipi friško ubrani crveni gariful na reveru o jakete joli košuje ako bi bilo vruće. Uvik je bi pun humora i dobre voje, a najskoli kad je tribalo zapivat.

Klapa Berekini

U svoje vrime bija je veliki galeb: kad su u pitanju Čekinje, ni mu bilo ravnega. Pokojni Škaja, Dragan Jurić i Milko Andrijašević, pa Kleme i još par nji stvorili su klapu Berekini, ka ča i jesu bili. Škaja je u žepu uvik jema malu usnu armoniku i sa njon je dava intonaciju, a ne bi tu malu armuniku da za sve šolde ovega svita.

Jedan put mu je na poklon donija jedan moj prijatej novu Hohner. Ma ke, on je lipo zafali i meka je doma u kantunal. Inšoma, nikad je ni upotrebi za dat ton pismi. Bi je neko vrime i diretur komunalnega poduzeće, ali to ni važno razdobje njegova životnega opusa.

Ono najvažnije je to da je voli more i ribanje. Od svi gušti na moru najviše je voli lignjolov. Vozija je jednu malu batelinu sa nikin starin Tomoson, koji je u ona vrimena bi car oli kraj motora do 5 konji. Kako se priko zime vadidu kajići vanka, tako je i Škaja izvadi svoj, ma je zaboravi konzervirat motor. Zato je na primaliće ti motor kroz zimu zariba. Nije to, bogami, našega Škaju zabrenzalo, vengo je on baci ti Tomos i u valu na vesla odija na lignje.

Lovi je cilu godinu

Posli bacivanja Tomosa nije više vadi brod priko zime vanka mora, vengo bi ga istega na žalo, očistija i pitura dno sa intoniton i nazad u more. Poza tin je lovi bome cilu godinu. Unda bi se često fali da on jedini lovi najmanje 365 liganj godišnje. Je bome, tako je bilo, a kad bi uvatija malešnu, stavija bi je u praznu škatulu o španjuleti. Kad bi bila veća, joli više nji, onda u plastičnu vrećicu. Kajić je veziva na poseban način – kroz alku na provi provuka bi petju o konopa i kroz nju ka kroz laso provuka bokun daske od po metra, debele 2 centa i široke 6 centimetri.

Kako je stari, malo-pomalo je zanemariva brod. Lupa je sa provon o rivu i puka je, pa se moglo šaku provuć kroz nastalu bužu. Posli je kupi jedan malešni motor od 3 konja jerbo njemu ni triba veći. Malo se s njin služi radi godin i bolesti, ali se unda sa tin počeja bavit njegov zet Toni. Puno vridan momak, koji je popravi brod i pitura ga. Bavi se vršaman, ma uvik dugo traži vrše jerbo ili mu ji niko makne, joli zaboravi orjentire.

Cilo misto u žalosti

Naš junak ove štorije Škaja počeja je slabo vidit i prista je izlazit iz kuće ka da se zasiti života i sam se stavija u kućni prežun. Žaj mi puno jerbo ga nisan dugo vidija. No, kako moj veliki prijatej i njegov netjak Boro zna njegovu situaciju, uvik san ga pita kakvega je zdravja.

Kako san radi ove kurbine korone produži stat u naše malo misto i nisan se vrnija u metropolu, prin dva dana zove me moj Boro iz Zagreba i kaže: – Znaš, umra mi je ujac Mate. Ka da mi je niko ukreja dil mene, tako san se osjeća, odnosno ka da mi je neko opalija plesku svon forcon da se zamantan.

Cilo naše malo misto je u žalosti i zato san nota – partija je Čovik. Jer, Mate Peko, zvani Njoko joli Škaja, bija je uistinu čovik sa svin atributiman koji određuju čovika. S ovin befelon bi se i oprostija od moga prijateja sa pozdravon – Adio, kumpanjo, i nikad više.

Znan da mi je prijateju Bori teško jerbo je Mate bija njegov idol i najdraži ujac. Neka mu je laka zemja i neka gori sviri u armuniku. Neka ponovo sastave Berekine jerbo ji je više gori nego doli. Osin toga, nadam se da jopet osvaja Čekinje. Živi i veseli bili, štioci dragi, pozdravja vas vaš morski čovik Šangarelo.

25. siječanj 2021 00:36