StoryEditor

priče čitateljaKako je Baćo diga zubaca na lutriji: ‘E kurbin sine, spremija san ti trapulu, i bez krene san te peška! Znan ja ča je red, cara va‘ja poštivat‘

Piše Nađan Dumanić
9. svibnja 2021. - 13:36
Paun Paunović/Ilustracija/Cropix

Moreš bit najbo'ji ribar, uvatit vagun ribe svake šorte, ma ako nisi uvatija cara, sve ti pada u vodu, u more oću reč. Puno svita današnjeg i ovdašnjeg ni ne zna ko je car o'rib, pa onda, lipi moji, eto van jedan edukacijun. Car jema caricu, kra'j kra'jicu, a ovod u Dalmaciju je sve u kontru pa tako i to.

Naše more jema cara i kra'jicu, car je zubatac, kra'jica je komarča, a od oni bile morske krvi jemamo i konte lubina, pica, arkaja, šarga, barbuna, pa prinčipese kirnju, škarpinu, švoju... Daleko bi nas svi fetivi plemići odveli. Od plave krvi jemamo tunja, skušu, inčuna pa sve do sardele od štajuna. Ma i to je u kontru jerbo je cili obor bila riba, a stimaju je kada plave krvi jema. Pomozi nan Bože priko šanpjera i fratra porcijaša brez kapelina sv. Jakoba (jakobova kapica – lepeza).

Ka' se reče car o'rib ni to floćavanje i film su otemu snimili, sitite se one glende Buža di se u jedan momenat svi zubacu klanjaju do tleja. Nima bo'je ribe na svitu, zaraj tega i je car, pa ga i kuvari od rišpeta s rišpeton stimaju, po carskome protokolu sparićaju. Od glave se učine juva su šakon riži, a sve do repice najboje jubi gradele, one prave na drivo, a ne na falši garbun oli letriku. Triba za sol jemat miru, pravega u'ja nesmi falit, a ni potla dobrega vina. Nemojte mećat petrusimul, limun i ružmarin ni salatu, vengo samo tri peruna lešane blitve i fregulu kruva ispod peke.

Riba tri puta va'ja plivat

Reka bi moj dida da je riba za guštat, ne za najist se, ma i sami znate da se nikor od ribe ni najija. Po' ure poza obida jopet si gladan. Riba tri puta va'ja plivat, a ja ću to još urešit: u more se napliva, u u'je zapliva, a u vino propliva i propiva. Potla zubaca i bidna maška debula ostane. Car je car i basta. Inšoma dela šoma, zaludu ti sve morske štorije ako nisi nikad zubaca uvatija. A to va'ja znat i sriće mrvu jemat jerbo bez pameti se more, a bez sriće teško.

Najbo'ji komadi platu buletu na panulu ka' se nagoluzu na živu lignju i onda mu largaj, kalmaj, škošaj, botaj ma prava umitnost triba za cara na pajole stivat. A vezat panulu, nadit, regulat prema dnu i dubini, korentu, brzini kaića, to je jopet diplomski rad. Za cara o'rib uvatit, car o'ribari va'ja bit.

I naš Baćo je volija ribu lovit, s kraja na šćape, iz kaića na kančanicu i odmet. Ma svašta je miša i ni bija loš. Svega blaga Božjega je priko krene pribacija, ma zubonju nikad.

Napunili mu glavu

A ovi iz lučice glavu mu napunili, najskoli prijate'j Keko – doklen cara ne zadiješ ka da ništa nisi uvatija. Nije da nije provava, višje puti je i s dokazanin meštrima od panule odija, ma ka' za pegulu od zubaca ni Z. Vrimenon se i pomirija i sebi bi reka, car mi nije notan, more bit da ću u drugi život jemat višje sriće, a ko zna more bit da se jopet i rodin ka' zubatac. Okrunjena glava uvik višje piza i meju sviton i meju beštjan.

I likaru za zafalit se nosi cara, pa je i Baćo lani zubaru jedneg odnija ka' mu je ovi dentjeru učinija. A zubar i zubatac se dobro slažu, prvi je dentist, a drugi dentex-dentex, svaki na svoj način spečalista o'zub.

Zove jedno jutro okolo devete ure Keko, alo Baćo jemaš li vrimena svratit na bićerin, molit ću te da mi ništo učineš. Svrati Baćo i Keko mu da numer od lutrije broj 7.

– Jutros san vižita peškariju i vazeja ovu kartelu za zubaca od 12 kili jerbo takovu zvir uvik lutrija dopade. U jedanaest uri će se znat koga je srića po'jubila.

I evo ti Baće, malo je i uranija na ona vrata od Marmontove di se već skupilo svita. Je li se zna ko je dobija, ne zna se, pritekla su još dva broja za prodat. Izvadi Baćo 20 kuna i dopadu ga brojevi 29 i 62 i sve je moglo počet.

Skoči ka oparen

Jedna mlaja furešta ča je tot trevila iz kurjožnosti iz kese izvuče numer 18. Nima nikoga, bit će čovik zaudobija. I tako je zaništa izvuklo još jedan broj, a onda mala zaviče – broj 29. Skoči Baćo ka oparen, samo je diga kartelu u arju jerbo ni od sriće besidu moga reč, a svi mu počeli pleskat ka da je za 'Ajduka da gol.

– E kurbin sine, spremija san ti trapulu, nikor ni Baću zajeba pa neš ni ti, vidiš da san te i bez krene peška... Onda se na kraj ribi poklonija i reka – znan ja ča je red, cara va'ja poštivat.

Zavrnija je rukav i utira zubonji ruku kroz justa do branči za lagje nosit i drito u Belvija svojima mrvu mast vadit. Kamarijeru je zapovidija da mu zove taxi jerbo cara doma triba vozit kako caru i dolikuje. Ka' je čuja za sve ovo, šjor Keko je obisija nos do poda, ne zaraj tega ča je Baćo dobija, vengo ča je on Baću na lutriju namirija. A i ni virova da Baćo ni prominija numere. Ma brzo ga je pasalo jerbo je cila klapa do dva dana na marendin došla caru čast pokazat.

23. lipanj 2021 00:06