Šjor Getriba, meštar o'komarči, naša je komad iskidane mriže barakude onako ka' malo veći tavajol. Namočija ga je u salamuru i zatega u more uza sami kraj pri dnu da se zadije koji škatar, volak oli žbirac, jerbo friška ješka najbo'je lovi.
Doša je po običaju ranije ujutro, raspremija šćape jerbo je najvolija na nji lovit, jušto onod di uvik brumaje i da će obać je li se ča zalipilo za oni retaj mriže pa da nadije.
Jema je ča i vidit - ništo se bili i lanpa, siguro je cipal putnik okida komu krenu i doklen je biža zadila se udica parica za mrižu.
Ni bija cipal vengo lubin o priko dva kila i ni ga udica uvatila vengo mu se rep zamrsija u najlon o mriže, a luštre ga blokale.
Zaletija se u kraj za ciplićen i upa je u trapulu ča ni bila trapula i gujca, boje reč repica...